我尋日去應徵茶水房助理,點知…… | Sanuker

cup-mug-water-tea-large

我叫家寶,啱啱上年考完DSE,考幾多分就唔好提啦,總之就入唔到大學。本來都有啲失望,啲姨媽姑姐成日話「而家週街都係大學生呀!你唔考返張沙紙點得呀?」,不過我見隔黎班允文考20分最後因為排錯Jupas結果都係入咗HKU……Space,自問又唔係咩讀書嘅材料,所以睇化晒架啦。

讀到大學又點姐?到最後咪又係幫誠哥打工!

放完榜之後個人其實都幾lost,完全唔ready踏入社會,但係阿媽日鵝夜鵝,叫我快啲出去搵工比家用。其實佢明唔明,唔係我無搵呀,而係我根本連人地打電話黎約我面試嘅機會都無呀!佢連上去interview口窒窒嘅機會都唔比我呀!我連比人拒絕嘅機會都無呀!

唉,得中六畢業,仲可以要求啲咩呀?

不知不覺就過埋十月,連八達通都變到得番「嘟」一聲,由學生變做社會人士真係好殘酷。結果,係我做咗三個月廢青之後,居然無啦啦有份辦公室助理請咗我,平時都係做下基本辦公室清潔、遞下文件、負責下茶水準備咁,做下做下咁到差唔多一年啦。

點知早兩個禮拜無啦啦公司話要裁員,仲話要執咗個pantry喎,搞到我立刻失業。係我暗爽可以又做番廢青之後,點知阿媽無啦啦同我講:「喂,阿仔,三姑姐whatapp屎我話有人一萬蚊請茶水房助理喎!不如你試下啦!」

既然阿媽去到咁盡,我都唯有頂硬上啦。於是,尋日我著咗阿媽逼我著嘅西裝(仲要係grad din買個套),gel返個周柏豪頭,執下自己個頹look,然後出發去見工。

上到去發現好靜焗,唔係好覺有我咁上下年紀嘅人。咁又係嘅,好似我呢啲畢咗業嘅後生仔,高學歷嘅都唔會做茶水助理,低學歷嘅做洗碗人工仲高啦。不過我好怕捱架,做洗碗真係唔啱我。等咗十分鐘左右,就有人嗌我入房面試啦。

「早晨,我姓陳,係公司HR senior manager。你今日係黎見茶水房助理呢個post?」
「早晨呀,我叫王家寶,係呀我係黎見茶水助理嘅。」
「咁不如你簡單自我介紹下呀。」
「Er…好,咁我叫王家寶啦,你可以叫我家寶就得。咁我就中六畢業,之前都做過一年辦公室助理,都有相關嘅工作經驗。」
「你話你做過辦公室助理,咁你個一年係做過啲咩?」
「Um…我平時主要就負責冲下野飲呀,拎茶比客咁。間唔中都會幫手買野飲野食,幫同事派下信送下貨咁。我相信我可以勝任茶水房助理呢一個位置!」
「除咗呢啲之外,咁我都想問下你識唔識一啲專業技能嘅,OK?」

嘩,茶水助理都有專業技能?唔通係特別嘅沖水方式?

「OK,你問啦。」
「你識唔識基本視窗操作?」

咩野係視窗操作呀?係咪即係抹窗?

「Er…視窗操作呀……er,我以前都試過一兩次嘅……」
「你知唔知咩係Unix、Linux?Oracle RDBMS、IVR systems?」

係咪新嘅咖啡牌子,我完全無聽過嘅!

「……er…唔係好知。」
「你有無做過監視同埋批量處理程序呢方面嘅經驗?」
「er,其實即係點?……係咪即係要監視同事飲咖啡定飲奶茶多?同埋要分析返佢地平均每杯用咗幾多茶匙糖?」
「其實你知唔知我地呢個位係做啲乜?」
「er?茶水助理……囉?」
「你呢個位呢,係要向公司內部同事提供IT服務同埋技術支援架喎,而且仲要執行系統備份同埋數據中心管理,對公司嘅IT系統進行作業排程、監視同埋批量處理程序。」
「下,乜茶水助理都要識IT架咩?!」
「家寶,你有無睇清楚我地個Job Ad?我地已經寫得清清楚楚。」
「er……」

跟住陳經理就憤怒咁拍門離去,留低我自己一個係會議室,我仲隱隱約約聽到佢臨閂門講咗句「而家啲九十後真係!」。

我諗極都唔明,點解我明明係去見茶水助理,會變咗IT support,唔通時日太快,無知的小孩一晚長大,茶水部同事其實真正身份係一個研究生?個個都研究點樣將少林功夫加斟茶遞水發揚光大?於是我返屋企即刻上網搵番佢個招聘廣告出黎睇。

20160127214511

……原來,陳經理無呃我。
……原來我連做茶水嘅資歷都唔夠。
……原來,呢個世界變得咁快。

我望唔透,我真係望唔透。

Leave a Reply

Your email address will not be published. Required fields are marked *